Арьяабалын бясалгалын авшиг нь аливаа сүнсний хүртэж болох хамгийн эрхэм Бэлэг юм. Биет номууд тустай ч БУРХАНЫ жинхэнэ, үггүй сургаалыг хүртээж чадахгүй.

Хятадаас И-Лин-гийн мандарин хятад хэл дээр ирүүлсэн сэтгэлийн үгийг олон хэлний хадмал орчуулгатай одоо хүргэе:

Оройн Дээд, Хамгаас Хүндэт, Хамгийн Агуу Эргэн Нэгдсэн Хамгийн Хүчирхэг Гуравт мөргөн сөгдмүй. Хамгаас Эрхэм Их Багш, Төгс Гэгээрсэн Их Багш Чин Хайд мөргөн сөгдмүй. Би 30 гаруй жилийн өмнөх нэгэн зүүдээ хуваалцахыг хүсэж байна.

1989 оны нэг өдөр би хятад “田” (тянь) ханзны хэлбэртэйгээр байгуулсан цэцэрлэг зүүдэлсэн юм. Түүний 4 хэсэг тус бүрд гүн ногоон өнгийн өргөн навчит ургамлууд, тод улаан, шар, нил ягаан цэцэгс ургаж байлаа. Янз бүрийн өнгөтэй ургамлууд, цэцэгс бүгд хүнээс өндөр, дэлбээлсэн цэцэгс нь түмпэнгийн чинээ байв. Тэд гайхамшигтай, олон янзын хэлбэртэй, эрч хүчтэй амьдралаар бялхаж байлаа. Би цэцэгт бутнуудын дундуур баяртай алхаж яваад цэвэрхэн, тэгшхэн газарт нэгэн булш байхыг харав. Булшны өмнө бичээсгүй чулуун хавтан босгожээ. Булшны баруун талд цагаан хавтастай ном байв. Хавтасны баруун дээд хэсэгт хятад хэлний “天日誌” (Тянь Ри Жи) гэсэн гурван ханзыг ердийн бичмэл хэлбэрээр “Тэнгэрийн тэмдэглэл” гэсэн утгатайгаар босоо чиглэлд бичсэн байв. Би сониучирхан номыг авч, хуудсуудыг нь нээв. Миний гайхшралыг төрүүлсэн нь гэвэл, дотор нь ганц ч үг байсангүй. Тэр даруй надад энэ бол Үггүй Үнэн Судар байна гэсэн бодол төрөв!

5 жилийн дараа би авшиг хүртэж, зүйрлэшгүй үнэт, хэмжээлшгүй их Эрдэнэ болох Арьяабалын бясалгалыг олж авсан. Тэр цагаас хойш миний амьдрал гайхамшгаар дүүрч, ер бусын учрал байнга тохиолддог болсон. Их Багшийн Хамгаалалт, Адислал дор би баяр хөөр, сэтгэл ханамжаар дүүрэн амьдарч ирсэн. Тэгээд 2008 оны нэг өдөр гэнэт тэр зүүдээ санаж, тэр дор нь нэг зүйлийг ухаарсан юм. Арьяабалын бясалгал бол Үггүй Үнэн Судар юм байна; Их Багш намайг Үггүй Үнэн Судар хүртэхийг 5 жилийн өмнөөс хэлсэн байжээ. Энэ дэлхийд амьд гэгээрсэн Их Багшийн байгаа үед л жинхэнэ Үггүй Үнэн Судрыг хүртэх аз завшаан бидэнд тохиодгийг би ухаарсан. Их Багш тэр зүүдээр дамжуулан бие махбод бол булшинд харьяалагддаг, харин сүнсний эцсийн зорилго бол эрх чөлөөнд хүрэх гэдгийг мөн сануулжээ.

Хязгааргүй талархал, эрхэмлэн хайрлах сэтгэлээр дүүрэн би энэ насандаа Их Багшийн дамжуулсан Арьяабалын бясалгалыг хүртсэндээ ямар их азтай бөгөөд сүнслэг баялагтай болсноо гүнээ мэдэрч, ухамсарлаж байна. Их Багшийн шавийн хувьд би Их Багшийн хайрласан Хайр, Ивээлийг байх л ёстой зүйл мэт үзэж, эсвэл хувьдаа аминчхан хүртэх ёсгүй. Харин Их Багшийн сургаалуудыг ухамсартайгаар хэрэгжүүлж, хичээнгүйлэн бясалгаж, хамаг төрөлтөнд үйлчлэх ёстой. Дэлхийн хувьд шийдвэрлэх энэ үед хамаг төрөлтөн болон гараг дэлхийд бүхэлдээ ач тусыг нь хүртээхийн төлөө бид Их Багшийн мэргэн сургаал төдийгүй хэмжээлшгүй Хайрыг нь түгээхэд чадах бүхнээ хийж, Их Багшийн мянган мутар, мянган мэлмий болж, дэлхийд Адислал авчрах зэмсэг нь болох учиртай. Хятадаас шавь И-Лин

Үнэнч бишрэлтэй И-Лин, Дотоод ахуй ойлголтоо бидэнтэй хуваалцсанд баярлалаа. Их Багш ухаарал хайрласан хариу илгээжээ:

“Чин үнэнч И-Лин, бясалгал тань улам сайжирч байгаад баяртай байна. Арьяабалын бясалгалын авшиг нь аливаа сүнсний хүртэж болох хамгийн эрхэм Бэлэг юм. Биет номууд тустай ч БУРХАНЫ жинхэнэ, үггүй сургаалыг хүртээж чадахгүй. Хүмүүний үгс ердөө бэлгэ тэмдэг бөгөөд Бурханлаг Бодит Мөн Чанарыг ариун дагшин эх мөн чанараар нь үнэн зөв дамжуулж чадахгүй. Учир нь БУРХАН бол Үнэний эх мөн чанар бөгөөд Түүнийг бэлгэ тэмдгээр дамжуулж бус, өөрийн биеэр, шууд мэдэрч хүртэх ёстой. Ариун Библид ‘Эхэндээ Үг байсан, Үг БУРХАНТАЙ хамт байсан, Үг БУРХАН байсан’ гэж айлдсан. Энэ нь Библид гардаг үгсийг бус, Арьяабалын бясалгалыг хийхдээ бидний шууд бясалган төвлөрдөг дотоодын Диваажингийн Аялгууны Урсгалыг зааж байгаа юм. Хүн төрөлхтөн удахгүй мунхгаас сэрж, Үнэнийг байгаагаар нь танин, веган болж, жинхэнэ сүнслэг амьдралаар амьдрах болтугай. Та болон Хятадын мэргэн ард түмэн өдөр тутмын амьдралдаа Төгс Хүчит БУРХАНЫ хэмжээлшгүй Хайрыг мэдрэх болтугай. БУРХАНЫ ИВЭЭЛЭЭР танд зүрх сэтгэлээсээ Адислал, Хайрыг илгээж байна”.